Ber var stofnað árið 1999 til þess að flytja inn beztu vín Spánar {og reyndar heimsins - Hógværðin er aðalsmerki Bers}.

Vega Sicilia, Pesquera og Clos de l'Obac eru vín sem hver safnari getur verið hreykinn af.

Í frægri og sérvizkulegri vínnótnabók Michael Broadbent er Vega Sicilia eina spænska vínið sem kemst í hóp þeirra stóru frönsku: Chateau Petrus, Latour, Lafite og DRC.

Robert Parker, sennilega frægasti vínpenni (elskar blek) heimsins, gaf Pesquera 100 stig af 100 mögulegum (líkti við Petrus) og setti þar með vínhéraðið Ribera del Duero á spænsku heiðunum norðan Madrid eftirminnilega á kortið.

Ber flytur inn öll helztu vín Ribera del Duero {nema kannski eitt}. Þ.á.m. Teófilo Reyes, Viña Pedrosa og ValSotillo auk Vega Sicilia og Pesquera. Ribera del Duero vínin þykja holdmikil, ávaxtarík og öflug en víngarðarnir eru í um 900m hæð yfir sjávarmáli, því eru nætur kaldar en hitasveiflur innan sólarhringsins eru eitt lykilatriði vínræktar. Margir framleiðendur í nýja heiminum þurfa að blanda sýru út í vín sín vegna þess hve jafnheitt er t.d. í Ástralíu.

Somontano uppundir Pýrineafjöllunum, með Bordó fyrir handan, er upprennandi vínræktarsvæði og Viñas del Vero, sem er fánaberi héraðsins, hefur tvisvar unnið hinn eftirsótta titil víngerð ársins hjá Club Gourmet, sem gefur árlega út bækur um vín, hótel og veitingastaði (neytendasamtök!?). Vínið Gran Vos fær reglulega 90 í einkunn í spænsku pressunni, venjulega í félagsskap fimmfalt dýrari vína.
Illu heilli var víngerð Viñas del Vero seld risanum Gonzales Byass og því fluttist umboðið frá Beri til Bakkusar. Við óskum þeim góðs gengis.

Í Navarra við ána Ebro sem rennur gegnum Rioja, sem flestir Íslendingar ranglega álíta eina og/eða merkasta rauðvínshérað Spánar, ræktar Guelbenzu fjölskyldan stjörnuvínin Evo og Lautus, sem bæði eru gríðarlega dökk, öflug og eikuð. Oft á fremstu opnu spænsku vínbókarinnar.

Miklar væntingar eru bundnar við héruð á suðaustur Spáni en í Jumilla og Yecla eru framleidd fyrirtaksgóð nýjaheimsleg vín af Agapito Rico (ekkert smánafn) og bræðrunum Castaño. Títtnefndur Parker gaf Hecula frá Castaño einkunnina 92/100 og játaði að hafa aldrei gefið jafnódýru víni svo háa einkunn. Sá hinn sami gaf Castaño Monastrell einkunnina 90/100, sem er frábær dómur yfir 1090kr víni, sem nýkomið er í sérbúðir ÁTVR.

 

Í fyrra fékk Ber umboð fyrir frábært lítið kampavínshús, Champagne Jacquesson, sem þykir eitt þeirra allra beztu og reyndar miklu betra en Ber hafði órað fyrir. Þrátt fyrir að vera nýbyrjað í sérverzlunum ÁTVR varð Brut Perfection / Cuvée 728 Brut fjórða mest selda kampavínið um síðustu jól og áramót.

Á einni mikilvægustu matvælasýningu Spánar, Alimentaria 2004, náðust samningar við hinn frábæra freyði- og rauðvínsframleiðanda Castillo Perelada. Cava Brut Reserva og Cava Seco eru fáanleg í ÁTVR. Í brúðkaupi Felipe de Borbon krónprins Spánar var boðið upp á bleika freyðivínið Cava Rosado.

Á þessari sömu sýningu fann Ber, sem elskar og hefur einbeitt sér að spænskum rauðvínum (góðum en ódæmigerðum, einhverra hluta vegna), loksins dæmigert spænskt rauðvín, þroskað og mjúkt með hinni klassísku vanillulykt.  Það að Monte Don Lucio frá La Mancha var valið eitt bezta vín Spánar í lægri verðflokkum varð til þess að njósnari Bers leitaði bás fyrirtækisins uppi og viti menn, vínið stóð fyllilega undir væntingum og fæst nú í Vínbúðum Lýðveldisins.

Til að standa undir þeirri sjálfsánægju að flytja inn beztu vín heimsins ákvað hin áræðna stjórn Bers að leita hófanna við einn frægasta vínframleiðanda Bandaríkjanna, Stag's Leap Wine Cellars, sem gerði garðinn frægan í umtöluðustu vínsmökkun allra tíma.

Árið 1976 safnaði vínmeistarinn Steven Spurrier saman þeim Kaliforníuvínum sem hann taldi áhugaverðust og tefldi þeim fram á móti nokkrum af stærstu vínum Frakklands, rauðvínum frá Bordó og hvítvínum frá Búrgúnd. Um þær mundir þóttu Kaliforníuvín ekki merkileg. Gamli heimurinn mat þau nánast eins og litið er á "kassavín" í dag. En - til að gera langa sögu stutta - sigraði Stag's Leap Cabernet Sauvignon 1973 í flokki rauðvína og öllum að óvörum stóðu Kaliforníuvínin vel uppi á hárinu á þeim frönsku. Úrslitin ollu talsverðri úlfúð í Frakklandi. Einn dómarinn sagði sig meira að segja frá dómi.
Samsvarandi smökkun hefur verið endurtekin, m.a. 2006 á þrjátíu ára afmælinu. Niðurstaðan þá kom kannski enn meira á óvart en hin upphaflega. Kaliforníuvínin (upphaflegu árgangarnir) röðuðuðu sér í efstu sætin en 1976 hafði verið nokkurt jafnræði með frönskum og amerískum. Þarna þótti endanlega hrakin sú mýta að nýjaheimsvín gætu ekki geymzt eins vel og þau frönsku.

Á því Herrans ári 2007 hóf Ber innflutning á vínum frá Stag's Leap og hafa þau fengizt hér nánast óslitið síðan.
Nýlega ákvað Ber að halda krossferð sinni áfram og tók að flytja inn vín frá tveimur öðrum stórhöfðingjum Kaliforníu, Parísarförunum Heitz Wine Cellar í Napa og Ridge Vineyards í Santa Cruz fjöllunum S-V af San Francisco.

Nú fyrir jólin bættust Silver Oak og Tablas Creek í hópinn.

Til að gæta einhvers jafnræðis flytur Ber inn nokkur af toppvínum Bordó, m.a. Chateau Latour, Ch. Margaux og Ch. Palmer.